ذي قصه قرأتها وحبيت انقلها لكم وانشاء الله تعجبكم والقصه للكاتبه دموع السحاب
الجـــــــزء الأول ..
قبل القصه راح اكتب تعريف بسيط جدا لشخصيات ..
عايلة ابو سعودعياله سعود عمره30 متزوج بنت عمه ناصر وعنده ولد واحد عمره سنه ونص تقريبا(سالم ) بدر عمره 28 توه راجع من برا وحاصل على الماجستير في ادارة الاعمال عبدالله عمره24 يدرس برا وبيرجع على نهاية السنه نوف ..اختهم الكبيره من البنات تعرف اخوانها من غير مايتكلمون متزوجه وعندها ولد واحد( احمد) ريوف..عمرها21 بالسنه الثالثه من الجامعه ريم عمرها 19 اول سنه بالجامعه ) عايلة ابو خالد..عياله خالد عمره 28 وانسان مختلف والكل يعرف هالشئ دائما قوي بأفكاره واختياراته وصريح ومحبوب يشتغل بشركتهم والاهم انه حنون على اهله وهذي ميزه فيه أمل..زوجة سعود ) (عايلة بو سلطان ..سلطان ..عمره 27 يحب ريوف بنت عمه وتقريبا الكل يعرف انها له يشتغل بالشركه وهو انسان مثقف وواعي وطيب رغد..عمرها 22 تدرس مع ريوف وهي توأمها وكاتمة اسرارها عبدالله ..عمره 24 وهو شاعر مبدع واغلب الوقت بعالم ثاني قليل مايطلع مع اهله ) وشخصيات نتعرف عليها من خلا ل القصه
14 / 12 / 1423 هـ يوم له ذكرى جميلة عند عائلة بو سعود ففي هذا اليوم قام كل البيت على صوت سعود وهو ياصارخ بأعلى صوته ينادي امه ..الي جت مسكينه تسرع من الخوف لحد ماوصلت غرفته وحصلته عند باب
سعود ...يمه لحقي علي امل تعبانه شكلها بتولد الحين شسوي الام قرب السياره وخلي خواتك يساعدونك ونزلوها تحت وانا بجيب عباتي يالله بسرعه وراحت ام سعود لغرفتها تاخذ عباتها .. وسعودي ينادي خواته ..ريوف ..ريم تعالوا بسرعه وطلعوا خواته من غرافهم وراحوا صوب غرفة سعود وساعدوه ونزلوا امل الي مسكينه كان مره تعبانه ركبت امل وام سعود مع سعود وراحوا للمستشفى وسعود ماعاد يشوف دربه مع كل صرخه لحبيبة قلبه امل يحس وده يطير حتى يوصل للمستشفى ..والحمد لله الله سهل عليهم وصلوا للمستشفى ودخلت امل غرفة الولاده وتم سعود رايح راد وامه تحاول تهديه وبعد ثلاث ساعة ..طلعت الممرضه وبشرت سعود انه جاه ولد وسعود من غير تفكير صار يقول .. صرت ابو سالم ..سالم الصغير شرف وراح وحضن امه وبعدها بنص ساعه حضن سعود ولده الي من غير شعوره بمجرد ماحضنه نزلت دموعه ..
سعود ..آه يابدر لو احكي لك من اليوم لبكرا عن احساسي ذاك اليوم وفرحتي مااقدر لكن هذا اليوم له اهميه عند امنا وابونا وكل العايله وعقبالك بدر ان شاء الله قريب نشيل ولدك
بدر ..لا وين عقبالك انا توني راد من برا ومحتاج وقت وبعدين الزواج يبي له استعداد وتهيئ وانا توني ماتهياءت
سعود ..اي استعداد ياشيخ عمرك 28 سنه استح على وجهك واخذت الماجستير ووظيفه وتوظفت وشتبي بعد
بدر ..الموضوع التهيئ النفسي لزواج
سعود ..بدر لاتطبق دراستك علي.. ابوك محضر لك مفاجأه الليله وياخوفي من الليله وش بيكون فيها
بدر ..سعود خير لاتقول الوالد بيخطب لي
سعود ..بدر انت عارف ان الوالد مابيخطب لك لان خطيبتك معروفه وهي تنتظرك
بدر ..خطيبتي ..معروفه ..منهي ..؟؟
وقبل مايرد سعود دخل ابو سعود وقاموا العيال لابوهم الي توهم كانوا معه بالشركه وجلس وتموا يسولفون لحد ماقال ابو سعود ..
هايابدر متى بتحدد اليوم الي يكون كل شئ رسمي بينك وبين بنت عمك
بدر من قوة الصدمه صار يناظر ابوه واخوه
ابو سعود ..وراء ماترد يابدر
بدر ..اي بنت عم يابه طال عمرك
ابو سعود ..وشهالحكي يابدر ..رغد بنت عمك الي الكل يعرف انها لك من سنين
بدر ..بس يايبه انا رغد عمري ماشفتها الا يوم كانت صغيره
ابو سعود ..بدر اشوفك جبت مع شهادتك طبايع الغرب ومن متى بناتنا يكشفن على عيال عمهم
بدر ..لا طال عمرك ماهو هذا القصد انا اقصد رغد صغيره ولافكرت فيها زوجه
ابو سعود ..اسمعني وانا ابوك انت رجال وماعليك قصور وبنت عمك شيخة الحريم وتقدم لها رجال ماينردون لكن بو نواف ردهم عشان يشري قرب ولد اخوه ورضى اخوه العود بنت عمك القريب والبعيد يعرف انها لك لاتهدم مابنيت بسنين عشان كلام الكتب الي قريته باامريكا ياابوك انا علمتك وانت قرر واذا تبي رضى ابوك اشر بنت عمك وقام بو سعود وراح لغرفته ..ولقى ام سعود توها مخلصه من صلاة الوتر وجلس عندها
ابو سعود ..ياام سعود بدر شكله بيسود وجهي قدام اخوي
ام سعود..افا والله ليه خير ان شاء الله
ابو سعود..شكله ماهو رايد بنت عمه
ام سعود..رغد كامله والكامل وجه الله وين بيلاقي مثلها وبعدين مافيه مكان مالت فيه انها مرت ولدي خل عنك انا بفهم بدر وان شاء الله مابيكون الا الخير قم نم يابو سعود ومالك الا العلم الطيب
ابو سعود ..ان شاء الله ..ربك كريم
وبمكان ثاني من بيت بو سعود كان سعود وبدر سعود ..بدر ليه ساكت
بدر ..افكر بهالمصيبه
سعدو ..لاحول ولاقوة الا بالله صارت مصيبه يابدر انا اخوك قولي ليه ماتبي رغد فيه احد ثاني ببالك ..؟؟
بدر ..لا مافيه لكن من رغد الله يخليك من اكثر من تسع سنين ماسمعت الظاهر صوتها وشلون اتزوجها
سعود ..والله صدق ابوي يوم قال جبت طبايع الغرب اعنبوك من متى انا نكلم بنات عمنا
بدر ..ياسعود افهمني انا عمري ماسمعت شئ عن رغد حتى مااعرف هي كم عمره وايش تدرس
سعود ..ماهي مشكله ناد ريم او ريوف ويقولون لك
بدر ..يعني حليتها يالفالح سعود كل انسان له وجهة نظر يعني عالاقل يمكن انا ابي اتزوج وحده بيضاء وهي سمراء
سعود ..ياتفهك ياشيخ
بدر ..انا اقول مثال لكن ليه تحرموني من اختيار او حتى التفكير بصفات زوجتي ويختارونها لي
سعود ..بدر كلامك منطقي لكن هذي عاداتنا انا عندك اخذت امل بنت عمي ناصر وشوفنا عايشين ومبسوطين
بدر ..الله يهنيكم لكن نجاح زواجك مايعني ان زواجي ينجح لازم يكون فيه اختيار مني وبعدين قبول حتى على الاقل احس بهذا الزواج
سعود ..بدر لاتطولها وهي قصيره فكر زين وتذكر ان بنت عمك ردت رجال كثير لان عمي كان واثق ان رغد لبدر ولاتنسى ان سلطان خاطب ريوف وان فيه اعمال وشراكه بين عماني كلهم لاتهدم كل شئ
بدر ..سعود قصدك ان رفضي ممكن يسبب مشاكل بين الاخوان لا عماني فاهمين ولا بيصير شئ
سعود ..اذا انت متعلم وانا وعيال عمك عمانك الكبار مثل ابوك عايشين على العادات والتقاليد والكلمه الي يقولها الرجال يعتبرونها عهد عليه واعلان برسمية هالزواج وابوك قالها كثير اما مزح او جد ..
بدر ..خير ان شاء الله انا بروح انام والله يكتب الي فيه الخير
سعود ..وين مابعد سهرنا مع سالم الصغير
بدر ..والله ماني رايق له اسهر معه لحالك هههههههههههه
سعود ..بكرا تتمنى ولدي يسليك بدر ..اشبع فيه ..تصبح على خير
سعود ..وانت من اهله ..
راح سعود لبيته الي بنفس سور اهله وهي مجمع سكني بناه ابوه فيه ثلاث فلل من غير البيت العود لسعود وبدر وسلطان الي بعده يدرس باامريكا ..
دخل سعود وحصل امل وولدها سالم بحضنها تغني له ..
سعود ..الله لايحرمني من هالصوت وصاحبه ان شاء الله
استحت امل ..ولامنك يابو سالم
وراح سعود وشال ولده الي بدا يرفع يدينه من شاف ابوه
وتم سعود سهران مع زوجته لحد الساعه ثلاث بعدها راحوا ينامون عشان بكرا الجمعه وراهم صلاة ..وبعالم ثاني كان بدر يفكر بالموضوع الي غير كل مخططاته كان مقرر يتم سنه او اكثر وبعدها يقرر يتزوج لكن ابو سعود خلى بدر يعيد حساباته ..وظل بدر يفكر لحد ماقرر انه يروح يسولف مع خواته ويعرف منهم بعض صفات رغد
بغرفة ريم كانت ريوف وريم سهرانات ويا بعض وسمعوا احد يطق الباب ..
ريم ..مين
بدر ..انا بدر اقدر ادخل
ريم قامت وفتحت الباب ..ياحيا الله اخوي نورت غرفتي
بدر ..الله وشحلاة كلامك يابخته ..
ريوف ..منهو الي بابخته
بدر ..يابخت سلطان بريوف والله
استحت ريوف ونزلت راسها
ريم ..ياحبي لاختي تستحي ..ادخل بدر تفضل
تم بدر عند خواته ويسولفون وفجأه رن تيلفون ريوف ..
ريوف ..هلا والله بام احمد عاش من سمع صوتك
ام احمد ..عاشت ايامك الغاليه ..شلونكم وشلون امي وابوي
ريوف بالف خير ..
ام احمد ..وسلطان شلونه
ريوف ..عندي بدر وريم بحط عالسبكر وكلميهم
ام احمد ..ياحيا الله اخواني والله جمعتكم حلوه تعال بدر خذني
بدر...ههههههه لاماني ناقص ابو احمد بشري الغاليه شلونك وشلون احمد وابوه
ام احمد ..بخير ياوجه الخير ..اجل وين سعود عنكم ريم ..سعود نايم بالعسل هههههههههه
ريوف وام احمد ...هههههههههههههههههه
بدر رفع عينه على اخته وصار يناظر فيها ..
ريم ..شفيك عادي هو دايم يقول هالكلمه ونقولها له
ابتسم بدر ..لا بس استغربت الكلمه
ام احمد ..بدر متى نبدأ نستعد ان شاء الله
ريم وريوف ..ايه صدق متى بدر بتقرر زواجك
بدر ..اذا الله اراد ان شاء الله ..نوف بكرا بتصل عليك ابيك بسالفه
نوف ..ان شاء الله اتصل بي الصبح يكون احمد نايم
بدر ان شاء الله ..تصبحين على خير الكل ..وانت من اهل الخير
طلع بدر وراح لغرفته وهو يقول بينه وبين نفسه الظاهر العروس بعد مجهزه ماناقص الا المعرس وصك على نفسه ودخل ينام
والساعه عشر الصبح صحى بدر واخذ له دش ولبس وقبل مايطلع قال خليني اتصل بنوف اكيد صاحيه وفعلا ردت عليه
نوف ..هلا والله بدر شلونك
بدر ..بخير الحمد لله انتم شلونكم
نوف بخير ونعمه ولله الحمد ..
بدر ..نوف انا مابلف ولاادور انا بقول لك الموضوع مباشره
نوف ..سم يااخوي تفضل
بدر ..نوف انتي اقرب خواتي لنا كلنا تعرفينا اكثر من غيرنا نوف انا ماابي اتزوج رغد
نوف ..ساكته ..وبعدين قالت ..ليه يابدر ..؟؟
بدر..اعرف قصدك مافيه احد في بالي لكن رغد لا ماابي اتزوج بهالطريقه ليه يختارون عني
نوف ..طيب يابدر انت شلون تبي تختار زوجتك
بدر ..مو هذا موضوعنا
نوف ..لا يابدر او اقول يااستاذ بددر ..اذا انت شايف ان بنت عمك الي حتى ماسألت هي فيها من صفاتك الي تطلبها ماتناسبك فكر كثير ..وراح تتوصل لنتيجه وحده مجتمعنا هذي طريقة بالزواج الاهل الي يخطبون لعيالهم صح بعض الناس الصدف تلعب دور وتخلي الولد يختار زوجته لكن هذا استثناء ماهو قاعده
نوف ..بدر انا فاهمتك زين لكن رفضك راح يجرح ناس كثير اولهم ابوك الي ماراح يكون قد كلمته
بدر ..خير ان شاء الله مع السلامه نوف
نوف ..مع السلامه
نزل بدر تحت وسلم على امه وبوه الي كانوا يفطرون بالصاله ..
ام سعود ..افطر يابدر بعد الفطور ابيك بسالفه
بدر..يمه مستعجل ونأجل السالفه لليل
بدر ..تأمرون بشئ
ام سعودوابو سعود..سلامتك يالغالي
طلع بدر من البيت وتم طول الوقت يفكر بكلام ابوه وسعود ونوف ..ولارجع للبيت الا الساعه تسع بالليل
بدر ..السلام عليكم
كل العايله ..وعليكم السلام
سعود..بدر ليه قافل جوالك تعبت اتصل فيك
بدر ..انتهت البطاريه
ام سعود ..بدر تعال ابيك بسالفه
بدر ..مايحتاج الغاليه انا موافق واليوم الي تامرون فيه انا جاهز بس بشرط
سعود عرف ان بدر وافق من غير قناعه لخاطر ابوه وامه
ابو سعود ..خير ياولدي سمعنا شرطك
بدر ..اشوفها قبل الملكه
ابو سعود ..وليه تشوفها عشان عقب تقول ماتبيها وتفشلني عند الله وخلقه
ام سعود..ياولدي بنت عمك كامله والكامل الله
بدر ..هذا حقي والدين عطاني اياه
ابو سعود ..ان شاء الله واخوي مابيرد لي طلب وانا اخوه الكبير
بدر..تصبحون على خير
الكل ..وانت من اهله
قام سعود مع بدر ..؟؟؟
ا الجزء الثاني ..
بغرفة بدر.. سعود..مقتنع يابدر بقرارك ..؟؟
بدر ..ماهو مهم على قولة نوف اذا ماتزوجت رغد بتزوج غيرها بنفس الطريقه خلينا نخلص ونفتك
سعود..بدر بنت عمك ماهي رخيصه حتى تقول هالكلام
بدر..وانا ماقلت شئ كل حقوقها تاخذها وغير كذا ماعندي
سعود..وشتقصد يابدر ؟؟
بدر ..ولاشئ لو سمحت سعود خليني لحالي برتاح ..
سعود ..ولايهمك ارتاح يالمعرس هههههههههههه
بدر ..بايخه مره اطلع وسكر الباب بعدك
سعود ..ايه طيب بايخه ..
طلع سعود وترك بدر مع نفسه وللاسف توصل بدر لقناعه انه بيعطي بنت عمه كل حقوقها الا الحب مستحيل يحبها مستحيل تكون ترجمة حلمه لواقع عن طريق رغد ماهي الانسانه الي تمناها زوجه ابدا .. وبدر انسان طيب وحبوب لكنه يكابر بمشاعره ولاهو بسهوله يبين حبه او يبين انه ضعيف ,,نام بدر وهالقناعه مسيطره عليه
وبغرفة ريوف كانت ريم تسمع كلام خواتها الي من قال بدر قراره راحت ريوف تكلم نوف وتقول لها لان نوف خبرتها عن الكلام الي قاله بدر ..وحطت ريوف السبيكر وتموا يسولفون مع بعض
ريم ..والله اخوك هذا مايقدر النعمه والا رغد وش ناقصها زين وخفة دم وعلم
نوف ..انا اعرف رغد لكذا ماكان ودي تروح بعيد ابيها لبدر وربي بتعجبه الله يهديه
ريوف ..والله لو انكم جاهلين ببدر بدر حجر مايلين ولايهمه لاخفت دم ولا حب ياعيني يارغد كل هالدلال والرومانسيه بتكون بالهواء
ريم وبوجه حزين ..بتنصدم بااخونا الاستاذ بدر
نوف ..بس انتي وياها والله بدر رجال مافيه مثله مع انه احيانا ينرفز
ريم ..نوف ..انتي وين رجلك جالسه تهذرين هههههههههه
ريوف ...هههههههههههههههههه عيب ريم
نوف ..الشرهه على الي جالسه وتاركه رجلها وتسولف معكم يالله مع السلامه
ريم ..نوف خلاص نمزح تعالي بكرا اشتقنا لحمود
نوف ..ايه انعدلي ههههههههه ان شاء الله مع السلامه ..
البنات ..مع السلامه
ريم وبأبتسامه خبيثه ..ريوف مااشتقتي لسلطان ..؟؟
ريوف والصدمه على وجهها من السؤال المفاجئ ..اعنبوك انتي ماتستحين هو انا شفته عشان اشتاق له
ريم..علي هالكلام ريوف اعرف انك تموتين عليه ههههههه
ريوف ..طيب امووت عليه واشتقت له موووت وشعندك ريم .. هههههههههه ماعندي شئ خلينا نكلم رغوده شرأيك..؟؟
ريوف ..الحين ..؟؟
ريم ..ايه بكرا عندكم اف واكيد هي صاحيه الحين
ريوف طيب ندق عالجوال وبعدين اذا صاحيه ننزل تحت اوكي(تخاف يرد سلطان ولايتركها بعدين لانه جريئ ويحب يسولف مع بنات عمه اذا صادف ورد عليهم )
ريم ..طيب يالله اتصلي
وتتصل ريوف ويدق جوال رغد ولا احد شاله وتنزل ريم وريوف عند التلفزيون ويخلون جوالاتهم بالغرفه
ويرن التيلفون وترتفع عين بدر تلقائيا عالساعه ويروح ويشوف الرقم ماعرفه
بدر ...الووو
المتصل ..لحظة صمت ..السلام عليكم
بدر ..وعليكم السلام والرحمه
المتصل ..عفوا اقدر اكلم ريوف
بدر ..لحظه
ويناظر بدر ريوف ويعطيها السماعه وشكله واضح انه ماهو راضي عن المكالمه لان الساعه كانت عالواحده
ريوف ..مين .؟؟
بدر ..مااعرف كلمي وقولي لي ..!!
ريوف ..شافت الرقم وقالت هلا والله رغوده
بدر عرف منو رغوده اكيد بنت عمه لكن استغرب من اتصالها بهالوقت وتم واقف عند الباب بمكانه ومع كأس العصير وسمع اخته
ريوف ..اتصلت على جوالك مارديتي لاني ماتوقعتك نايمه قلت اسألك عن الاختبار (تكذب عشلن بدر واقف والا هي بتسولف )
رغد..لا عيوني مانمت بس كنت عند عبدالله ورجعت وشفت رقمك اكثر من مره واتصلت مارديتي قلت اتصل عى البيت بس من الي رد علي سعود عندكم للحين (هي شاكه انه بدر بس تتأكد)
ريوف وهي تحاول تخفي ابتسامتها ..لا هذا بدر مو سعود
رغد سكتت ..وضحكت ريوف ماقدرت.. بدر على باله قالت رغد شئ عنه وضحكت ريوف وقال .. تصبحون على خير .. طلع بدر وظلوا البنات يسولفون شوي وعقب سكروا وراحوا ينامون
الساعه وحده الظهر في بيت ابو سعود ..دخل سعود وزوجته وولده الي اخذته ريم وجلست تلعب معه ودخل ابو سعود وبدر وسلم بدر على امل زوجة سعود ..
بدر ..هلا ام سالم شلونك
امل ..بخير الله يسلمك شلونك انت
بدر ..الحمد لله بخير ..ولف بدر على سالم واخذه بحضنه الا امه داخله لصاله وشافته
ام سعود ..عقبالك ماتشيل ولدك يمه
الكل ..امين ..وبدر يحاول ان يتصنع ابتسامه
ابو سعود ..هايابدر يوم الاربعاء نروح لبيت عمك كلمته ووافق انك تشوف رغد
بدر ..الي تامر فيه يصير يبه
ابو سعود ..كفوا اولدي اجل نتكل على الله يوم الاربعاء تجهزي ياام سعود انتي والبنات وقولي لنوف بعد
بدر ..ليه يبه نروح كلنا انا وانت نشوف البنت ونرجع
ابو سعود وبدأ يعصب ..يوم الاربعاء بنخطب رسمي بوجود كل عمانك والا ناوي تشوف البنت وتهون
بدر ..لا مابهون وبصوت واطي لو تكون شمال والي ابي يمين
ابو سعود ..شقلت ؟؟
بدر..سلامتك صار الي تامر به طال عمرك
وفي بيت ابو سلطان الكل مجتمع بعد الغداء ابو سلطان وام سلطان ورغد وسلطان وعبدالله كان طالع معزوم على الغداء
ابو سلطان ..يوم الاربعاء كل اخواني بيجون عندنا
ام سلطان ..حياهم الله البيت بيتهم
ابو سلطان ..رغد ابوي عمك سالم بيجي يخطب رسمي وشقلتي
رغد ..استحت وهي تموت على بدر قالت الشور لك يبه
سلطان ..رغد هالموضوع مافيه مستحى اذا موافقه قولي
ابو سلطان ..موافقه رغد من غير ماتقول بس الله هديه بدر طالب يشوفها قبل
ام سلطان ماعجبها الكلام ..افا والله ليه بيشوفها وعقب يتركها
خافت رغد معقوله يعملها بدر ويفضحها ويقولون شافها ولد عمها وتركها وقطع تفكيرها سلطان
سلطان ..حقه يمه مانقدر نمنعه
ام سلطان ..وليه ماشفت اخته انت مادامه حق
سلطان ..يمه الله يطول بعمرك انا ريوف اعرفها زين مايحتاج اشوفها
سلطان كان جريئ واذا اتصل يسلم على بنات عمه وشاف ريوف بالصدفه اكثر من مره
ابو سلطان ..تجهزي يابوي يوم الاربعاء ولانبي لبس هالايام فاهمتني ابوي
رغد ..ان شاء الله يبه
وقام ابو سلطان يرتاح وراحت معه ام سلطان وظل سلطان ورغد بالصاله ورغد متعوده تسولف مع سلطان لانه طيب ويسمع لاخته حس سلطان ان رغد خافت من طلب بدر
سلطان ..رغودده لو لف الدنيا مابيحصل مثلك صدقيني
رغد.بأبتسامه باهته ...عشاني اختك تقول كذا
سلطان ..لا لانك اجمل بنات العايله زين وعقل وعلم يحمد ربه ..ان الله رزقه برغوده
تطمنت رغد من كلام اخوها ..وطلعت غرفتها وكل تفكيرها بيوم الاربعاء اليوم الي تشوف فيه حبيب عمرها بدر
وبسرعه جاء يوم الاربعاء وفي بيت ابو سلطان الكل مشغول ومرتبك الدخون والقهوه والشاي والحلويات ورغد بحاله ثانيه لانها مو بس خطبتها لا هي غير عن كل بنات العايله هي الوحيده الي طلب خطيبها يشوفها..
وفي بيت ابو سعود الكل كان جاهز وبدر ولا هامه ولا كأنه رايح يخطب لانه اعتبر زواجه واجب مجبر ينفذه ولا اعطى نفسه فرصه يحس بالفرحه او حتى الخوف ..وصل عمهم ابو خالد وراحوا كلهم لبيت ابو سلطان .. وبعد مادخلوا الحريم والرجال راحوا للمجلس وقام سلطان واخوه بواجب ضيوفهم دخل سلطان واشر لبدر بعد ماطلب منه ابوه انه يطلع معه عشان يشوف اخته ..
سلطان..تفضل بدر للمجلس الثاني ودقيقه وتجي رغد
بدر.وتوه يحس بالارتباك والخجل من سلطان ...اسف ياسلطان لكن انت انسان متعلم و...
سلطان يقاطع بدر: يااخوي حقك ولافيها شئ تفضل ارتاح
ودخل بدر وطلع سلطان ونادى رغد الي كانت بتموت من الخوف ومعها البنات كانوا يحاولون يهدونها وصلت عند الباب وقالت لها ريم
ريم ..اقري المعوذات لا يعطيك عين اخوي ههههههه
رغد ماتدري تضحك على ريم والا تصيح من الخوف توكلت على الله ودخلت
رغد ..السلام عليكم (يتبع)
يلا وروني شطارتكم بالردود عشان التكمله
الماااااااااااااااااااسه
المساهمات : 78 تاريخ التسجيل : 03/11/2007
موضوع: رد: قصه رغد (رومانسيه مره) الخميس نوفمبر 08, 2007 12:41 am
مشكور يابرنسيه الشرقيه بس والله حرام تعبت وانا اقراء القصه كبري الخط الله يخليك وتقبلي مروري
الرئيسية 
أحدث الصور 
التسجيل 
دخول 
موضوع: قصه رغد (رومانسيه مره) 
